اجابة على سؤال...

مبارك عليكم الشهر وعساكم من عوادة

أدري متأخرة شوي .. بس تدرون أول أيام رمضان مع حوسة الزوارات والزحمة الموطبيعية

طبعا

بناءا على بوست الأخت فشه وهو الاجابة على سؤال الاخ نموول التي بدورها فشه قد وجهته لي

( أكمل على اسلوبج الصعب لوول)

اكتب عشرة اشياء تعرفها عن نفسك

*************************

1- قلبي طيب الحمدلله

2- عصبية

وشغلات صغيرة تنرفزني بسرعة

3- اتردد في وايد مواقف وامور مرات يكون مو من صالحي

4- فيني جرئة بس أحس مو كافية لأن مرات يتهضم حقي:(

5- مشكلة اني واااايد اشيل بقلبي وماقدر انسى المواقف الي تجرحني

6- بنفس الوقت اسامح بسرعة الي يغلط علي ومرات عقبها اتحسف لان في ناس ماتستاهل

7- صعب اقول (لأ) حق احد يطلب مني خدمة لدرجة اني وايد مرات انحط بموقف محرج لوول

8- صريحة مع القراب مني لاني احبهم بس مرات صراحتي تضايقهم:(

9- حساسة وايد وينكسر خاطري بسرعة

10- اجتماعية واحب الصحبة :)

اغلب الشغلات سلبية لووول

شكرا الاخ نموول لانك مررت السؤال حق فشه .. ومشكووورة فشه لانج مررتي لي :*

Food mixing !!

واايد مرات اسمع من ناس انهم يخلطون انواع من الاكل مع بعض وياكلونها.. يعني شغلات مالها شغل ببعض بالمرة !!! ومافكرت بيوم من الايام ان هالشغله تنأكل مع هالشغلة!!

كذه مره اتنح لما احد يسألني جربتي تاكلين بوب كورن ملح مع كاتشب مثلا؟؟؟؟؟ @@

ففكرت احط هالخلطات ببوست وعرضه يمكن تكونون مجربين وتعطونا رايكم :)

• سنكرز+حليب ككاو كي دي دي (مادري شلون ياكلون ككاو ويشربون ككاو أحس يسحن الجبد لوول)
• من ماكدونالدز ملك شيك +بطاط (أهم شي حليب مع ملح)
• عيش أبيض + كاتشب (هاذي سوينها واحنا يهال واااايد لوول)
• جبن تشدر+ تفاح أخضر (شلوووون؟؟؟ )
• رقي+ فيتو (الصراحة افكار)
• بطاط كيتكو الخواتم+مالتيزر(بنت عمي ذوقتني مره أشوه كان طعمه زين ما لاعت جبدي)
• ريدبول+ مجبوس دياي(عفيه مووود)
• موز+خبز(في لبنان يبيعونه بالمطاعم بس الصراحة ماقدر اتخيل الطعم)
• أيس كريم + صاج (مطعم يم الفنار يسويها الله يزيد النعمة)
• مخلل+ بيبسي( وحدة اعرفها ماتستغني عنه مرات لما نطلع نتمشى لازم تمر مطعم فرح تاخذه منه لوووول)
• حليب بارد+كل شي (يعني اهو المشروب الي يشربونه مع كل انواع الاكل !! )
• لبن+ تايم اوت (شخباري تام اوت ليلحين موجود؟)

*******************************************

الصراحة اتوقع المفروض ياخذون براءة اختراع على هالخلطات

وسالفة البوب كورن مع الكاتشب صج ;)

من ذكريات الجامعة

أذكر أيام الجامعة كنا مشغولين نجهز حق المؤتمر الاعلامي حق قسم الاعلام

ونستعد حق الشغل بالاذاعة الجامعية

طبعا كانت حوسة مو طبيعية وذلونا على ماوافقوا على تنفيذ المؤتمر علماً بأن هالمؤتمر صاير من قبل جم مرة

المهم ان من بين التجهيزات كنا بنسوي زاوية بالقاعة نعلق فيها صور ميمعينها الطلبة من المؤتمرات السابقة ومن بين الصور شفت صور لحليمة بولند انصدمت منها الصراحة!!!! انا عبالي انها معدلة بالفوتوشوب بس تنحت حدي لما قالي الدكتور انها صور حقيقية

صج ان الموضوع قديم

بس ليلحين حااارني

ماتوقعت ان الخبال يوصل لي هالدرجة

شوفوا الصور وحكموا

عبط نهاية الدوام

أمس وحدة من رفيجاتي دزتلي مسج سؤال عبييييييييييط وهو

الطيارة فيها هرن؟؟؟

فشغلت بمخي تساؤلات وايد من هالنوع وقعدنا في البيت كل واحد يقط قطه من صوب

فقررت مع الموكا فرابتشينو الي جدامي والحان اغنية (فلة مالت سبيستون) الي رفيجتي الحلوة مشغلتها من الصبح

اني اكتب بعض هالتساؤلات العبيطه الي خطرت في بالي ويمعتها من يمعة القطات الي امس

لعل وعسى نلقى لها جواب مع بعض !!!

1- نقدر نبجي تحت الماي؟؟

2-دراكولا يقدر يتبرع بالدم ؟؟

3-طرزان مو طول عمره عايش بالأدغال؟ ليش شعره يطول ولحيته ماتطول؟

4-ليش لما الاسنسير يتأخر نقعد نضغط على الدقمة حيييل ونفغصها .. يعني الاسنسير بصير أسرع جذي؟ لا واذا واحد يه عقبك يشوفك واقف هم يضغط مره ثانية ... يعني انت الحين واقف تنبل ومو طالب الاسنسير؟؟

5-ليش لما يكون الجو مطر دايما نسأل : ها قاعد يطق مطر برة؟؟ يعني مثلا بيطق داخل مثلاااا؟

6-منو نوجد اول الدياية ولا البيضة؟

7-اذا مركز المطافي احترق يدقون على منو؟

8- ليش مرات بالرسوم المتحركة يحطون شمس لابسة نظارة؟ مو النظارة لازم تحميها من الشمس؟

الصراحة انا قفلت مالقيت جواب حق الأسئلة ولا انتو شرايكم؟

Hii :)

هااي

الصراحة ماتوقعت اني بيوم من الأيام راح يكون عندي بلوق

بـــــــــــــــــــــــــــس

صديقتي الحلوة

Fishah

شجعتني وصار الي صار

;)